Lebin aksi gözüm yaşını mey tek lâle-gûn etti

Lebin aksi gözüm yaşını mey tek lâle-gûn etti
Zenahdânın murâdım dest-gâhın ser-nigûn etti

Sana aksin mukâbil durduğuyçün hüsn lâfiyle
Anı câm içre gayret garka-i girdâb-i hûn etti

Özün nisbet kılardı zülfüne zencir her sâ’at
Bu sevdâlar anı ser-halka-i ehl-i cünûn etti

Anun tek kim perişanlık ziyâsın artırır şem’in
Bana cevrin ziyâd olmak sana meylim füzûn etti

Müjen hancerlerin gönlüm basar bağrına vehm etmez
Ana câdû gözün gûyâ ki tâ’lim-i füsûn etti

Bakâ-yi sûret-i Şirin için tevfik mi’mârı
Binâ-yi aşk-i Ferhâd’ın esâsın Bi-sütûn etti

Fuzûli’den sebât ü sabr-i cevr ü kahr az iste
Ki ol bî-çâreni derd ü gamın bi-hâd zebûn etti