Bilmez idim bilmek ağzın sırrını düşvâr imiş
Ağzını derlerdi yok dediklerince var imiş
Âciz olmuş yıkmağa âhiyle kûhu Kûh-ken
N'eylesin miskin anun aşkı hem ol mikdâr imiş
Taşa çekmiş halk için Ferhâd Şîrin suretin
Arz kılmış halka mahbûbun aceb bî-'âr imiş
Ka'be ihrâmına zâhid dediler bel bağladı
Eyledim tahkik anun bağlandığı zünnâr imiş
Ömrlerdir eylerim ahvâl-i dünyâ imtihân
Nakd-i ömr ü hâsıl-i dünyâ hemân bir yâr imiş
Zevk-i didâriyle dil-dârın yok ettim varımı
Devlet-i bâki ki derler devlet-i didâr imiş
Dün Fuzûlî arızın görgeç revan tapşırdı cân
Lâfedip derdi ki canım var emânet-dâr imiş
