Girip mey-hâneye mûğ meşrebiyle kim ki hû eyler

Girip mey-hâneye mûğ meşrebiyle kim ki hû eyler
Olup mü’min behişte kâfirim ger ârzû eyler

Meger divânedir sevdâ-yi ebrûsiyle zâhid kim
Bakıp mihrâba dâ’im öz özüyle güft-ü gû eyler

Dem-â-dem katre katre kan yaşımdır kim çıkar gözden
Veyâ peykânların kim âteş-i dil anı su eyler

Reh-i aşkında olman teng-dil sevdâ hücûmundan
Tarîk-i saltanat her kim tutar gavgâya hû eyler

Dedim kimdir perişân eyleyen âşıklar ahvâlin
Sabâ gösterdi târ-i sünbül-i zülfün ki bu eyler

Fuzûlî zülfüne bağlandı ammâ öyle inceldi
Ki gûya za’f anı hem zülfüne bir târ mû eyler