Gerd-i rehin ey eşk yudun çeşm-i terimden

Gerd-i rehin ey eşk yudun çeşm-i terimden
Terk-i edep ettin n’ola düşsen nazerimden

Hûnin müjelerdir mi ve yâ merdüm eliyle
Oklar çekilip taşra atılmış ciğerimden

Her bâde ki sensiz içerim bezm-i belâda
Hûn-âb olur elbette çıkar dîdelerimden

Seyl-âb-i sirişk ile hoşum aşk yolunda
Hâşâk-i ta’allûk koparır reh-güzerimden

Taşlara dögüb başımı rüsvâ gezer oldum
Ey akl kaçıp kurtulagör derd-i serimden

Kes mihrini ey çerh güneşten sana her subh
Bir şu’le yeter âteş-i âh-i seherimden

Sîm-âb-i sirişk etti beni garka Fuzûlî
Tâ devr cüdâ kıldı büt-i sîm-berimden