Kıldı ol serv seher nâz ile hammâma hırâm
Şem’-i ruhsârı ile oldu münevver hammâm
Görünürdü bedeni çâk-i giribânından
Câmeden çıktı yeni ayını gösterdi tamâm
Nil-gün futaya sardı beden-i uryânın
San benefşe içine düştü mukaşşer bâdâm
Oldu pâ-bûs-i şerifiyle müşerref leb-i havz
Buldu didâr-i lâtifiyle ziyâ dîde-i câm
Sandılar kim satılır dâne-i dürr-i arakı
Urdu el kîseye çoklar kılıp endişe-i hâm
Kâkülün şâne açıp kıldı hevâyı müşgin
Tîğ mûyun dağıdıp etti yere anber-fâm
Tâs elin öptü hased kıldı kara bağrımı su
Yetti su cismine reşk aldı tenimden ârâm
Çıktı hammâmdan ol perde-i çeşmim sarınıp
Tuttu âsâyiş ile gûşe-i çeşmimde makâm
Merdüm-i çeşmim ayağına revan su döktü
Ki gerek su döküle servin ayağına müdâm
Müzd-e hammâm Fuzûli veririm can nakdin
Kılmasın sarf-i zer ol serv-kad ü sîm-endâm
