Çerh her ay başına salmış kaşından bir hayâl

Çerh her ay başına salmış kaşından bir hayâl
Bu cihettendir her ay başında olmak bir hilâl

Mâh-i nev olmuş kaşın sevdâsının ser-geştesi
Şehrden şehre gezer âvâreler tek mâh ü sâl

Ettiğiyçin hüsnüne karşı kemâl izhârı gün
Bir gün olmaz ki ana gerdûn yetirmez bir zevâl

Subh kıldın cilve gün çekti özün bir gûşeye
Şâm arz ettin ruhun şem’i eritti infi’âl

Kılma gözden çihre vü hâlin nihan kim kılmaya
Dûd-i âhım af-tâbı çihre-i gerdûna hâl

Olmayıp makbûl-i hâk-i der-gehin mâh-i tamâm
Zâ’f-i tâli verdi gün günden ana tağyîr-i hâl

Ey Fuzûlî mâh-nisbet mahv kıl varın tamâm
Ger dilersen bulmak ol hur-şîd ile bir ittisâl