Nihâl-i servdir kaddin kaşın nûn ol nihâl üzre

Nihâl-i servdir kaddin kaşın nûn ol nihâl üzre
Misâl-i nokta-i nun hâlin ol müşgin hilâl üzre

Olup hayran götürmen hatt ü hâlinden nazar gûyâ
Gözüm merdümleridir noktalar ol hatt ü hâl üzre

Ham ettin kâmetim ger terk-i ser kıldımsa ma’zûrum
Ne özrüm var eger derlerse olmaz nokta dâl üzre

Zülâl-i hûn-i dildendir gözüm peymânesi memlû
Habâb altındadır ol nokta kim korlar zülâl üzre

Yazar göz perdesine eşk şerh-i hâl bilmez kim
Okunmaz kan ile yazılsa hat evrâk-i âl üzre

Dem-â dem kilk-i müjgân ile tıfl-i merdüm-i çeşmim
Hat-i sevdâ-yi hâlin meşk eder levh-i hayâl üzre

Fuzûlî’nin tarîk-i nazma tab’ın müstakîm etmiş
Hayâl-i kâmetin kim bir eliftir i’tidâl üzre