Batalı kana okun dîde-i giryân içre
Bir eliftir sanasın kim yazılır kan içre

Yeridir sine-i sûzânıma gül-han deseler
Ancak kim yandı okun sine-i sûzân içre

Cânı ten içre ne saklardım eger bilseydim
Ki değil gizli gam-i lâ’l-i lebin cân içre

Alagör oklarını dîdelerimden ey dil
Hayfdır olmaya nâ-geh yite müjgân içre

Çâk gönlüm yaresinde yaraşır peykânın
Ikd-i şeb-nem hoş olur gonce-i handân içre

Kaddine serv demiş goncelerin ta’nından
Duramaz bâd-i sabâ hiç gül-istân içre

Ey Fuzûlî kime sûz-i dilimi şerh edeyim
Yok benim kimi yanan âteş-i hicrân içre