Yâ men ahâta ilmüke’l-eşyâe külleha
Ne ibtidâ sana mutasavver ne intihâ
Kim verse can yolunda bulur hâk-i makdemin
Gûyâ ki hâk-i râhınadır nakd-i cân behâ
Sensin kılan mezâhir-i ümmîd-i bîm edip
Mûsâ’nın ilm genci asâsını ejdehâ
Ya’kûb’da nişâe-i şevkin gam ü elem
Yûsuf’da neş’e-i nazarın behcet ü behâ
Bulmazdı kahrın açmasa hân-i siyâsetin
Hel min mezid lokmasına dûzah iştihâ
Senden buluptur Ahmed-i Mürsel makâm-ı kurb
Tahsîn ü Yâ vü Sin ile teşrîf-i Tâ vü Hâ
Yâ Rab belâ-yi kayda Fuzûlî esîrdir
Ol bî-dili bu dâm-i küdûretten et rehâ
