Riştedir cismim ki devr-i çerh vermiş tâb ana

Riştedir cismim ki devr-i çerh vermiş tâb ana
Merdüm-i çeşmim düzer her dem dür-i sîrâb ana

Sâye-i zülfün şeb-istândadır şem’-i ruhun
Nice yetsin kadr ile hur-şid-i âlem-tâb ana

Dürd-i mey tek garka-i hûn-âbe gördüm gönlümü
Gör ne geldi başına n’itti şarâb-i nâb ana

Kâmet-i ham birle bir ehl-i kerâmettir kaşın
Taş olubdur gûyyâ baş eğmemiş mihrâb ana

Derd dürdüdir safâ-bahş-i harîf-i bezm-i aşk
Sâkiyâ çok etme teklif-i şarâb-i nâb ana

Çeşmini ehl-i nazar kasdına ta’yîn eyleyen
Tîr-i gamzenden müheyyâ eylemiş esbâb ana

Terlemiş ruhsâr ile hublar açarlar gönlümü
Gör ne gül-şendir ki âteşten verirler âb ana

Silk-i ehl-i hâle çekmiş zâhidi eşk-i riyâ
Mis kimi kim sîm kadrin bildirir sîm-âb ana

Ey Fuzûlî kalmamış gavga-yi Mecnûn’dan eser
Gâlibâ efsâne-i Leylî getirmiş hâb ana