Kemâl-i hüsn veriptir şarâb-i nâb sana
Sana helâldir ey muğ-beçe şarâb sana
Seni melek göreli yazmaz oldu aşkı günâh
Veli yazıldı bu yüzden besî sevâb sana
Lebin su’âline vermez cevâb uşşâkın
Su’âl olursa bu senden nedir cevâb sana
Cezâ gününde sorulmaz hatâlar eylediğin
Yeter figân ile ben verdiğim azâb sana
Beni karârım ile koymaz oldun ey gerdûn
Yeridir âhım ile versem inkılâb sana
Safâ-yi cevher-i tîğinden umma kâm ey dil
Sağınma su vere ey teşne ol serâb sana
Fuzûlî başına ol serv sâye saldı bu gün
Uluvv-i rif’at ile yetmez âf-tâb sana
