Cânımın cevheri ol lâ’l-i güher-bâra fidâ
Ömrümün hâsılı ol şive-i reftâra fidâ
Derd çekmiş başım ol hâl-i siyeh kurbânı
Tâb görmüş tenim ol turra-i tarrâra fidâ
Gözlerimden dökülen katre-i eşkim güheri
Leblerinden saçılan lü’lü’-i şeh-vâra fidâ
Çâk-i sinemde olan kanlı ciğer pâreleri
Mest çeşminde olan gamze-i hun-hârâ fidâ
Pâre pâre dil-i mecrûh-i perişânımdan
Ser-i kûyunda gezen her ite bir pâre fidâ
Cân ü dil kaydını çekmekten özüm kurtardım
Cânı cânaneye ettim dili dil-dâra fidâ
Ey fuzûlî n’ola ger saklar isem cân-i azîz
Vakt olan kim ola bir şûh-i sitem-gâra fidâ
