Yâr vaslın isteyen kesmek gerek candan tama’
Her kişi kim vasl-i yâr ister kesin andan tama’

Ârzû-yi vasl-ı cânan câna âfettir gönül
Yâ ta’allûk cândan üz yâ vasl-i cânandan tama’

Çün bana bir zerre yok tâb-i temâşâ-yi cemâl
Ben kimim vasl etmek ol hur-şîd-i rahşandan tama’

Âşık oldur kim temennâ-yi belâ-yi hecr ede
Yoksa çoktur mihr eden ol mâh-i tâbandan tama’

Rişte-i tûl-i emel dâm-i belâdır n’eyleyim
Üzmek olmaz ol ser-i zülf-i perîşandan tama’

Ârızın görmek hâyatım tâze eyler veh ne ayb
Ger gedâ vech-i ma’âşın kılsa sultandan tama’

Muttasıl hirman kılar hâsıl tama’dan ehl-i hırs
Turfa kim artar ana geldikçe hirmandan tama’

İster olsan hasret ü hirmâna her dem düşmemek
Kes Fuzûlî dehrden ümmîd ü devrândan tama’